Bawi Jesu a ghün lo ba nak ah Paschal poi

M’Cìm-hngün khùi ghóng véi.

 Hngüp k’chüih ung a k’htük hngüp, Maria Magdalena cuh a k’hmüp ung ng’dáwt htá neh m’cim-hngün-ah lo neh ng’phuh lung-khùi khainák-ah lung cuh, m’hlé-ah kia hleih hnguh ci. 2 Cun-ah kia hleih Simon Petru lah Jesu-ah m’hni-ah a-hlu-läk dáwng neh, “M’Cim-hngün khùi-ung-kah, Báwi cuh hteh püi pi ci gùi. Ahòi ami thà kä hmat,” ci neh m’thein tu goi ci.

3 Cun-ah kia hleih Petru lah a hei a-hlu-läk tumat cuh lut lo neh m’cim hngün-ah lo ci goi. 4 Ani dáwng zah ung a cun-ah a hei tumat nawh Petru phlän neh dáwng neh, m’cim-hngün-ah gok mà ci. 5 Ani nawh a m’htihnák-ung, ng’tom zih a ng’phlu hnguh ci. Cun tu pang-a phih, kä lut ci. 6 Hngú ghüt ci-ah Simon Petru cuh, gok lo tu neh m’cim hngün khùi ung lut nehtah k’poih ghüt ci-ah ng’tom zih lah,              7 Ng’Tom zih awn kä ät-ah, ng’phlu tu hngá ci-ah, lù pìn cuh, hnguh ci. 8 Cun kon-ah m’cim hngün-ah gok mà ci-ah tumat cun phih, lut tu neh hnguh tu nehtah zùm ci.     9 A i-ah kia hleih ci ung sih ci gùi-ung-kah, Báwi ghing lo bà khai ci-ah m’cäinák cuh kä k’síng pha ci goi. 10 Cun kon-ah, a-hlu-läk goi cuh, ani pó gùi-ah, hteit bà ci goi.

Maria Magdalena ng’dángnak ci.

11 Maria cuh ng’phuh lung-khùi k’pùng-ah ng’düí neh kiap ci. Cun-ah a kiah zah ung m’cim hngün ’kiòng-ah ng’htäk nehtah 12 Khãnhtapup hngih, a bók hlùi neh Jesu m’sännák zah-ah, lù-kung-ah tumat, khaw-kung-ah tumat, ngoh ni hleih hnguh ci. 13 Nganí nawh, “k’Hngumí aw, a i-ah kia hleih na kiap ci ang?” ci ni hleih, “Ka Báwi hteh püi pi ci gùi. A hòi ami thà phih kä ka hmat ci,” ci ci. 14 Cun-ah piéin nehtah a hngú-ah ng’hlat neh Jesu ng’düí hleih hnguh ci. Jesu bä-ah phih kä hmat ci. 15 Jesu nawh, “k’Hngumí aw, a i-ah kia hleih na kiap ci ang? A u na sùi ci ang?” ci hleih ng’vòng m’tät-ah ng’ngài neh, “Nang phäí htá, na lák-ah a kia ung na thànák na k’hmuh tu-ä. Ani cuh, ka lak khai,” ci neh ani àm piéin ci. 16 Jesu nawh, “Maria aw,” ci hleih k’síng bà nehtah a piéin cuh, “Báwi aw,” ci ci. Piéin hlü cuh, “A ng’vái aw,” a ci. 17 Jesu nawh, “Kä na k’pang-èin nä. A i-ah kia hleih ci ung kei cuh, Pá-ah kä ka kài pha ci. Cun tu pang-ah phih, ka nàü gùi-ah hteit-ä. Ka Pá lah, nami Pá, ka Khãnpùghí lah, nami Khãnpùghí-ah ka kài khai ci ci, ci neh m’thein gùi-ä,” ci neh ani àm piéin ci. 18 Maria Magdalena cuh Báwi-ah hlu-läk gùi-ah hteit neh, “Báwi ka hnguh ghüt ci,” ci nehtah a m’cäi gùi phih, m’thein tu gùi ci.